Të shtënat në Uashington/ Mjeku i pasur me apartament 1.1 milionë dollarë u konfliktua për mykun

Një mjek i pasur është identifikuar si autori i sulmit të armatosur në një palestër në Uashington. Bëhet fjalë për doktor Matt Lambert, i cili ishte përfshirë në një konflikt të ashpër me shoqatën e pronarëve të apartamenteve ku banonte, për shkak të shfaqjes së mykut në banesën e tij me vlerë 1.1 milionë dollarë (904 mijë euro).

Dr. Matt Lambert, mjek i specializuar në kujdesin intensiv, kishte paditur në mars të vitit 2025 shoqatën e pronarëve të apartamenteve “Metropole”. Ai pretendonte se punimet për rikonstruksionin e ndërtesës, të cilat përfshinin vendosjen e skelave dhe mbulimin e saj me perde mbrojtëse, kishin shkaktuar përhapjen e mykut në apartamentin e tij.

“Dy vite jetë luksoze (dhe fillimi i një periudhe gjashtëmujore pa dush, tharëse rrobash, kondicioner dhe mundësi për të gatuar)”, thuhej në një postim të publikuar të mërkurën në platformën X nga një llogari e lidhur me Lambertin.

Postimi shoqërohej me fotografi që tregonin punimet e rikonstruksionit në apartamentin e tij, në zonën Logan Circle.

Sipas New York Post, konflikti me shoqatën e pronarëve lidhej me kushtet e banimit dhe problemet e shkaktuara nga myku në apartamentin luksoz. Lambert, i cili banonte në katin e shtatë të ndërtesës, hapi zjarr mëngjesin e së enjtes brenda palestrës që ndodhej në katin përdhes, duke vrarë të paktën një person. Më pas, ai vrapoi drejt apartamentit të tij dhe u barrikadua aty për gati një orë, përpara se t’i jepte fund jetës.

Policia e Uashingtonit deklaroi se po hetonte konfliktin e tij me shoqatën e pronarëve të apartamenteve si një motiv të mundshëm të sulmit të armatosur, ku mbeti një person i vrarë dhe katër të tjerë u plagosën.

Lambert kishte ngritur padinë në mars të vitit 2025, duke pretenduar se përpara nisjes së punimeve të restaurimit të mbikëqyrura nga shoqata, banesa e tij nuk kishte pasur probleme me depërtimin e ujit, mykun, aromat e mykut, grumbullimin e lagështirës apo dëmtime të tjera të ngjashme.

Megjithatë, sipas pretendimeve të paraqitura në padi, pas mbulimit të ndërtesës me struktura mbrojtëse gjatë punimeve, apartamenti i tij nisi të shfaqte dyshime për depërtim uji, myk, grumbullim të konsiderueshëm lagështire dhe dëmtime të tjera të lidhura me këto probleme.

Në faqen e tij personale në internet, Lambert e përshkruan veten si mjek i certifikuar në fushën e mjekësisë së urgjencës, me më shumë se dy dekada përvojë klinike, si dhe drejtues në sektorin e teknologjisë mjekësore. /PiranjatNews/