FIFA ka arkëtuar rreth pesë miliardë dollarë nga shitja e biletave dhe paketat e mikpritjes për Kupën e Botës 2026, sipas ra...
BOTA
Vritet punonjësi në centralin e Zaporizhias, IAEA dënon sulmin me dron: Rrezikohet një aksident bërthamor
PiranjatPërditësimi i fundit 30 October 2026, 08:40
Një punonjës i centralit bërthamor të Zaporizhias në Ukrainë, i cili ndodhet nën kontrollin e forcave ruse, është vrarë në një sulm me dron. Lajmi është bërë i ditur nga Agjencia Ndërkombëtare e Energjisë Atomike (IAEA), e cila ka shprehur shqetësim për sigurinë e personelit dhe rrezikun që paraqesin sulmet pranë objekteve bërthamore.
Viktima ishte një saldator që punonte në një punishte ku po kryheshin riparime në centralin më të madh bërthamor në Evropë. IAEA nuk dha detaje të mëtejshme mbi rrethanat e sulmit dhe as nuk përcaktoi nëse përgjegjësia i takon forcave ruse apo ukrainase.
Drejtori i përgjithshëm i agjencisë, Rafael Grossi, e cilësoi çdo sulm ndaj punonjësve të centralit bërthamor si “krejtësisht të papranueshëm”, duke u bërë thirrje palëve ndërluftuese të tregojnë përmbajtje maksimale. Ai paralajmëroi për rrezikun e një aksidenti bërthamor, nëse vazhdojnë sulmet që kërcënojnë sigurinë e objektit dhe personelit që punon aty.
Edhe pse të gjashtë reaktorët e centralit janë aktualisht të mbyllur, ata duhet të vazhdojnë të ftohen për të shmangur rreziqet. IAEA mban një ekip të përhershëm në central për të monitoruar situatën dhe kushtet e sigurisë. Ndërkohë, luftimet në pjesë të tjera të Ukrainës kanë shkaktuar viktima të shumta civile. Sipas autoriteteve ukrainase, të paktën 20 persona u vranë në sulmet e së enjtes, përfshirë 14 persona nga një sulm me dron rus ndaj një stacioni treni në Dnipro.
Një tjetër person humbi jetën në Kiev nga një sulm me raketa balistike, dy vajza u vranë në Chernihiv, ndërsa tre persona të tjerë humbën jetën në Kremenchuk.
