Nënkryetari i Kuvendit të Shqipërisë, Agron Gjekmarkaj, zhvilloi një takim në Parlamentin e Kroacisë me nënkryetarin e...
AKTUALITET
EMRI/ Shqiptari vdes tragjikisht në punë, lë pas gruan me dy fëmijët
PiranjatPërditësimi i fundit 6 Tetor 2026, 18:40
Zv/prokurorja Sara Posa ka urdhëruar autopsinë e trupit të Saim Myrtajt, muratorit 59-vjeçar shqiptar, i cili humbi jetën të hënën pasdite pas një aksidenti të rëndë në punë.
Ekzaminimi pritet të sqarojë nëse burri, i cili ra nga një skelë e ngritur në kantierin e një pallati në rrugën Coletti, në Rimini, ishte goditur nga ndonjë problem shëndetësor para se të binte apo nëse bëhej fjalë për një aksident tragjik.
Aktualisht, Prokuroria ka nisur një hetim ndaj personave të paidentifikuar, me akuzën e vrasjes nga pakujdesia, për të kryer të gjitha verifikimet e nevojshme dhe, veçanërisht, për të kuptuar përse Myrtaj ndodhej i vetëm në nivelin e tretë të skelës, kur, sipas rindërtimit fillestar të ngjarjes, ai dyshohet se ka rënë në hapësirën e shkallëve.
Në të njëjtën kohë, hetuesit duhet të përcaktojnë nëse muratori kishte veshur të gjitha pajisjet e sigurisë, si helmetën dhe rripin e sigurimit. Ndërkohë, e gjithë skela është sekuestruar për të verifikuar respektimin e rregullave të sigurisë në punë.
59-vjeçari, i cili rezulton se kishte numër TVSH-je (Partita IVA), në të kaluarën kishte pasur kompaninë e tij të ndërtimit, por kohët e fundit duket se punonte si artizan i pavarur për llogari të kompanive të tjera.
Menjëherë pas aksidentit fatal, punonjësit e Shërbimit të Mjekësisë së Punës morën në pyetje si punëdhënësin e muratorit, ashtu edhe një banor të pallatit, i cili rreth orës 13:30 të së hënës dëgjoi një zhurmë të fortë që vinte nga jashtë ndërtesës në rrugën Coletti. Pasi doli në tarracë, ai pa trupin e pajetë dhe dha menjëherë alarmin, duke kërkuar ndërhyrjen e ekipeve të shpëtimit.
Personeli i urgjencës 118, që mbërriti në vendngjarje, e gjeti Myrtajn në arrest kardiak. Pas reanimimit, ai u transportua me urgjencë me helikopter në spitalin “Bufalini” në Çezena, ku 59-vjeçari ndërroi jetë pak pas mbërritjes në spital.
Sipas të dhënave të bëra publike, muratori kishte mbërritur në Rimini në fillim të viteve 2000 dhe kishte nisur të punonte në kantiere ndërtimi. Ai lë pas bashkëshorten dhe dy fëmijë, një djalë dhe një vajzë.
Familja e tij ishte e integruar në zonë dhe e njohur brenda komunitetit shqiptar në Rimini. Gjatë orëve të fundit, komuniteti është solidarizuar me familjarët e 59-vjeçarit. Shoqata “Agimi Rimini” shprehu publikisht dhimbjen dhe zinë për vdekjen e bashkëkombësit, duke iu bashkuar ngushëllimeve pas tragjedisë.
Ngushëllime janë shprehur edhe nga institucionet e Riminisë, me kryebashkiakun Jamil Sadegholvaad në krye, si dhe nga institucionet e rajonit.
Të martën në mëngjes, përpara Prefekturës së Riminisë, sindikatat zhvilluan një protestë për të sensibilizuar opinionin mbi tragjedinë e “vdekjeve në vendin e punës”. /Piranjat News/
