Betohet Parlamenti i ri izraelit/ Lideri i opozitës zotohet të krijojë qeveri të emergjencës 

Ish-shefi i ushtrisë izraelite, Gadi Eisenkot, të cilit i është besuar detyra për formimin e qeverisë së ardhshme të Izraelit, deklaroi të martën (10 nëntor) se ishte i përkushtuar për krijimin e një qeverie të unitetit kombëtar në gjendje të jashtëzakonshme, “sa më shpejt të jetë e mundur”.

Eisenkot foli përpara betimit të parlamentit të sapozgjedhur të Izraelit. Megjithatë, rruga drejt formimit të qeverisë së re mbetet e paqartë, pasi zgjedhjet e përgjithshme nuk prodhuan një rezultat përfundimtar. Ato i hoqën kryeministrit Benjamin Netanyahu shumicën parlamentare, ndërsa rivalëve të tij kryesorë nuk u dhanë një rrugë të qartë drejt pushtetit.

Eisenkot dhe aleatët e tij gjithashtu nuk kanë shumicën e nevojshme dhe deri më tani ai nuk ka arritur marrëveshje me partitë që mund ta ndihmojnë të vijë në pushtet. Nëse as Eisenkot dhe as Netanyahu nuk arrijnë të formojnë koalicionin qeverisës, vendi mund të shkojë drejt zgjedhjeve të tjera.

Netanyahu do të vazhdojë të jetë kryeministër në detyrë derisa një kandidat i ri të arrijë të formojë një koalicion qeveritar.

Aleanca e partisë së tij të djathtë, Likud, me partitë e ekstremit të djathtë dhe ato ultra-ortodokse, arriti rezultate më të mira nga sa pritej në zgjedhje, por gjithsesi humbi shumicën parlamentare. Ajo zotëron tashmë 53 nga 120 vendet në Knesset, parlamentin izraelit. Partia e qendrës së djathtë Yashar e Eisenkotit dhe fraksionet aleate kanë gjithsej vetëm 48 vende. Megjithatë, ata mund të kenë si aleatë të mundshëm partitë arabe të Izraelit, të cilat zotërojnë 19 vende në parlament dhe janë të bashkuara me Eisenkotin në kundërshtimin e tyre të fortë ndaj Netanyahut. /PiranjatNews/