Tuneli i Skërficës, pjesë e aksit Kardhiq-Delvinë, është përballur me probleme të përsëritura me depërtim...
BOTA
"Sapo u fejova, më lini të jetoj"/ Dy vëllezërit dhe miku i tyre vriten pa asnjë arsye dhe autori mburret para shokëve
PiranjatPërditësimi i fundit 10 Tetor 2026, 16:18
Një gjykatë në Meksikë shpalli fajtorë të premten tre burra të akuzuar për vrasjen e tre turistëve të huaj në vitin 2024: dy vëllezërve australianë, rreth të 30-ave, dhe mikut të tyre amerikan. Ngjarja shkaktoi zemërim në Meksikë dhe reagime ndërkombëtare. Sipas një gazetari të AFP-së, i pranishëm në sallën e gjyqit në Ensenada, gjykatësi deklaroi në vendimin e tij se tre të pandehurit, të gjithë shtetas meksikanë, i kishin kryer vrasjet me paramendim.
Ensenada, një qytet i njohur si destinacion për adhuruesit e sërfit, u kthye në skenën e një krimi të rëndë që tërhoqi vëmendjen e opinionit publik. Gjykatësi pritet të shpallë masën e dënimit të premten e ardhshme, më 16 tetor.
Dy vëllezërit australianë, Jake dhe Colum Robinson, përkatësisht 30 dhe 33 vjeç, si dhe miku i tyre amerikan, Carter Rhodes, 30 vjeç, u vranë në prill të vitit 2024, teksa po bënin kamping në një plazh të izoluar në Ensenada, në shtetin e Baja California, në veriperëndim të Meksikës.
Trupat e tyre u gjetën disa ditë pas zhdukjes, me plagë plumbash në kokë.
Gjatë gjyqit, prokuroria theksoi se tre turistët u sulmuan në befasi dhe u vranë kur ishin të pambrojtur, pa mundur të bënin as rezistencën më të vogël. Sipas akuzës, pas krimit, njëri prej të pandehurve ishte mburrur se kishte në zotërim sendet personale të viktimave.
Sipas dëshmisë së të dashurës së të dyshuarit kryesor, Jesus Gerardo Garcia, i njohur me nofkën “El Kecas”, ky i fundit ishte mburrur se Carter Rhodes i ishte lutur që ta linte të jetonte, duke i thënë se sapo ishte fejuar.
210 vjet burg
Prokuroria ka kërkuar një dënim prej 210 vitesh burg për secilin prej të pandehurve, megjithëse dënimi maksimal i parashikuar nga ligji në shtetin e Baja California-s është 60 vjet burg.
E dashura e të dyshuarit kryesor u dënua në nëntor të vitit 2025, në një gjyq të veçantë, me 20 vjet burg, pasi u shpall fajtore për nxitjen e vjedhjes, konkretisht të gomave të automjeteve të viktimave. Në atë kohë, ajo ishte 23 vjeçe.
Nëna e dy vëllezërve Robinson, Debra, nuk mundi t’i mbante lotët pasi dëgjoi vendimin e gjykatës.
Gjatë dëshmisë së saj, të dhënë një ditë më parë, ajo tha se gjëja më e tmerrshme ishte se “në momentet e tyre të fundit, ata u trajtuan në mënyrë kaq çnjerëzore”.
Babai i tyre, Martin Robinson, duke lexuar një deklaratë në emër të të dyja familjeve, e cilësoi vendimin si “një moment të rëndësishëm në rrugëtimin tonë të gjatë dhe të dhimbshëm për të siguruar drejtësi për fëmijët tanë të dashur”.
Baja California, një nga shtetet më të dhunshme të Meksikës, është e përfshirë nga krimi i organizuar, ku bandat merren kryesisht me trafikun e drogës. Megjithatë, turistët e huaj rrallëherë janë objektiv i drejtpërdrejtë i karteleve.
Vitet e fundit janë regjistruar disa raste kur vizitorë të huaj kanë rënë viktima të grupeve kriminale në bregdetin e Paqësorit të Meksikës.
Në nëntor të vitit 2015, dy sërfistë australianë, Dean Lucas dhe Adam Coleman, u vranë në shtetin e Sinaloas, në veriperëndim të Meksikës, ndërsa trupat e tyre u dogjën. /PiranjatNews/
