Gjykata spanjolle pezullon aktivitetin e organizatës së ekstremit të djathtë “Nucleo Nacional”

Një gjykatës spanjoll ka urdhëruar pezullimin e aktivitetit të grupit të ekstremit të djathtë “Nucleo Nacional”, në kuadër të një hetimi për krime të dyshuara të urrejtjes dhe krijim të paligjshëm të organizatave. Lajmi u bë i ditur të enjten (12 nëntor) nga një gjykatë në qytetin verior të Gijonit.

Vendimi parashikon mbylljen e selisë së grupit, bllokimin e përmbajtjeve të tij në rrjetet sociale, si dhe ngrirjen e llogarive bankare.

Masa vjen pas arrestimit të 14 anëtarëve të NN javën e kaluar, të dyshuar për nxitje të urrejtjes ndaj grupeve vulnerabël dhe personave me ideologji të kundërt. Policia ushtroi kontrolle në selinë e organizatës në Madrid, si dhe në disa ambiente të tjera.

Përfaqësuesit e grupit nuk kanë qenë të disponueshëm për të dhënë një koment mbi vendimin.

Gjatë kontrolleve, policia sekuestroi më shumë se 20 armë zjarri, disa prej të cilave pa leje, si dhe sasi të mëdha municionesh dhe armësh të tjera të paligjshme.

NN, e cila e përshkruan veten si një lëvizje politike, ka qenë në vëmendjen e autoriteteve spanjolle për retorikën e saj kundër emigracionit. Vëmendja ndaj saj u shtua veçanërisht pas kalimit masiv të mijëra emigrantëve drejt enklavës spanjolle të Ceutës, në Afrikën e Veriut, në muajin korrik, ku anëtarë të organizatës zhvilluan protesta kundër emigracionit.

Autoritetet spanjolle pretendojnë se organizata rekrutonte dhe indoktrinonte të rinj, përfshirë edhe të mitur, duke i nxitur të kryenin akte urrejtjeje, diskriminimi dhe dhune ndaj grupeve vulnerabël.

Në faqen e saj zyrtare, “Nucleo Nacional” e përshkruan veten si një lëvizje që synon një “zgjim kombëtar” dhe krijimin e një komuniteti aktivistësh të trajnuar, të aftë për të ndërmarrë atë që organizata e cilëson si veprimtari politike dhe shoqërore “autentikisht revolucionare”.

Gjykata bëri të ditur se disa prej figurave kryesore të organizatës janë vendosur tashmë nën masa sigurie, përfshirë ndalimin e largimit nga Spanja dhe detyrimin për t'u paraqitur çdo javë pranë gjykatës. /PiranjatNews/