Hailey Bieber rrëfen problemet shëndetësore pas lindjes: U përball me një çrregullim pak të njohur

Modelja dhe sipërmarrësja Hailey Bieber ka folur hapur për një periudhë të vështirë pas lindjes së djalit të saj, Jack Blues, duke zbuluar se është përballur me çrregullimin disforik premenstrual (PMDD), një gjendje që shkakton simptoma të forta emocionale dhe fizike.

29-vjeçarja tregoi në një intervistë për Women's Wear Daily se vështirësitë nisën pas ardhjes në jetë të djalit të saj, në gusht të vitit 2024. Ajo u diagnostikua rreth gjashtë muaj pas lindjes, pasi vuri re se simptomat që përjetonte para menstruacioneve ishin shumë më intensive se më parë.

“Pas lindjes së djalit tim, u përballa pak me këtë gjendje dhe nuk ka shumë biseda apo kërkime shkencore rreth saj”, u shpreh Hailey.

Modelja tregoi se ditët para ciklit menstrual ishin veçanërisht të vështira, pasi përjetonte mendime dhe emocione shumë të forta, duke e bërë çdo shqetësim të dukej shumë më i madh nga sa ishte në të vërtetë. Ajo shpjegoi se këto ndjesi fillonin të qetësoheshin me nisjen e menstruacioneve, ndërsa me kalimin e kohës simptomat u përmirësuan gradualisht.

Çrregullimi disforik premenstrual (PMDD) është një formë shumë më e rëndë e sindromës premenstruale (PMS). Ai mund të shoqërohet me ankth të fortë, depresion, irritim, ndryshime të theksuara të humorit dhe simptoma fizike, të cilat mund të ndikojnë ndjeshëm në jetën e përditshme, marrëdhëniet dhe punën. Hailey ka folur gjithashtu për rëndësinë e diskutimit të hapur mbi shëndetin e grave, duke theksuar se ndarja e përvojave personale mund t'i bëjë ato të ndihen më pak të vetmuara përballë vështirësive.

“Bisedat, personalisht, më bëjnë të ndihem më pak e vetmuar. Kur ndajmë përvojat tona dhe flasim për gjërat me të cilat po përballemi, kjo e bën rrugëtimin të duket më pak i vetmuar”, tha ajo.

Pavarësisht sfidave të periudhës pas lindjes, modelja ka treguar se mëmësia është një nga përvojat më të bukura të jetës së saj. Hailey dhe bashkëshorti i saj, Justin Bieber, u bënë prindër për herë të parë më 22 gusht 2024.

Ajo ka zbuluar edhe dëshirën për të zgjeruar familjen në të ardhmen, duke pranuar se do të dëshironte një tjetër fëmijë, por pa i vendosur vetes një afat kohor.