Ndjekja nga policia/ 40-vjeçari shqiptar gëlltit kokainën, në gjendje kritike në spital

Një 40-vjeçar shqiptar ndodhet në gjendje kritike për jetën në Maltë, pasi dyshohet se ka gëlltitur një sasi lënde narkotike në përpjekje për t’i shpëtuar arrestimit gjatë një kontrolli rutinë policor në rrugë.

Ngjarja ndodhi të dielën në mëngjes në St Paul's Bay dhe çoi në arrestimin e dy shtetasve shqiptarë, përkatësisht 42 dhe 40 vjeç. Gjatë kontrollit, policia gjeti në posedimin e tyre një sasi të konsiderueshme të një substance që dyshohet se është kokainë, si dhe dy thika.

Sipas policisë, rreth orës 11:00, në rrugën Triq il-Ħalel, efektivët ndaluan një automjet pasi vunë re se as drejtuesi dhe as pasagjeri nuk kishin vendosur rripat e sigurimit. 

Gjatë kontrollit, policia konstatoi se pasagjeri kishte me vete një dorezë metalike me thumba, e njohur si “knuckle-duster”, si dhe një sasi lënde të dyshuar narkotike. 40-vjeçari ka kundërshtuar arrestimin dhe është përpjekur të largohet me vrap, ndërsa gjatë kësaj kohe ka gëlltitur një sasi të substancës së dyshuar si drogë. Ai u transportua me urgjencë në spitalin “Mater Dei”, ku mjekët konfirmuan se ndodhej në rrezik për jetën.

Edhe drejtuesi i automjetit tentoi të largohej, por u arrestua pak më vonë dhe vijon të mbahet në ambientet e policisë. Gjatë arrestimit, një rreshtere e policisë pësoi dëmtime të lehta dhe mori trajtim mjekësor në një qendër shëndetësore. Hetimet për zbardhjen e plotë të rrethanave të ngjarjes vijojnë. /PiranjatNews/