Rruga në Mallakastër e pakalueshme prej 8 vitesh/ Banorët denoncojnë dëmtimet nga transporti i druve

Banorët e lagjes Lumara, në Aranitas të Mallakastrës, i janë drejtuar redaksisë së Piranjat News për të denoncuar gjendjen e rëndë të rrugës, e cila, sipas tyre, prej më shumë se 8 vitesh dëmtohet gjatë sezonit të dimrit nga kalimi i mjeteve të rënda që transportojnë lëndë drusore.

Sipas denoncuesve, pesha e madhe e këtyre mjeteve ka dëmtuar ndjeshëm rrugën, duke e kthyer atë pothuajse në të pakalueshme për banorët e zonës.

Problemi bëhet edhe më shqetësues gjatë sezonit të vjeljes së ullinjve. Banorët pretendojnë se për shkak të gjendjes së rrugës, fermerët hasin vështirësi për të transportuar prodhimin e tyre drejt fabrikave të përpunimit, duke rrezikuar kështu edhe të ardhurat e familjeve të tyre.

Përmes Piranjat News, banorët i bëjnë thirrje Bashkisë Mallakastër dhe institucioneve përgjegjëse që të ndërhyjnë për riparimin e rrugës, por edhe të marrin masa për të parandaluar përsëritjen e kësaj situate.

“Banorët nuk mund të sakrifikojnë jetesën e tyre për shkak të mungesës së përgjegjësisë institucionale. Kërkojmë zgjidhje konkrete, jo premtime!”, shprehen ata në denoncimin e dërguar në redaksinë e Piranjat News.

Deri më tani, banorët kërkojnë një zgjidhje konkrete për këtë problem që, sipas tyre, vijon prej vitesh. /PiranjatNews/