Rezultoi me i votuari në sondazhin e "Shekulli"-t, Florjan Binaj për mbështetjen e qytetarëve: Përgjegjësi!

"Shekulli" ka publikuar një sondazh ku i pyeti ndjekësit se cili do të ishte kandidati që do të votonin për kryetar të bashkisë së Tiranës, nëse zgjedhjet do të mbaheshin këtë të diel. Në rezultatin e llogaritur deri më tani, më i votuari rezulton aktori Florian Binaj, i cili ka marrë 28% të votave, i ndjekur nga Arlind Qori, Erion Braçe dhe Ilir Alimehmeti me nga 15%.

Në një përgjigje për "Shekulli"-n, ai e cilësoi besimin e qytetarëve një përgjegjësi.  

Kujtojmë se Binaj e konfirmoi se do kandidojë i pavarur në zgjedhjet lokale të 9 majit. Ai bëri të ditur se u ka shtrirë dorën e bashkëpunimit të gjitha partive opozitare, me synimin për të krijuar një front të përbashkët, pavarësisht dallimeve në mënyrën se si ato synojnë të arrijnë objektivat e tyre.  

“E konfirmoj pa diskutim kandidimin. I qëndroj asaj që kam thënë në nëntorin e kaluar, kur u anuluan zgjedhjet. Jam kandidat i pavarur që ua kam shtrirë dorën e bashkëpunimit të gjitha partive të opozitës, për të krijuar një bashkëpunim që ka të njëjtin qëllim, por mënyra të ndryshme”, deklaroi Binaj./ SHEKULLI