Numër i veçantë në fanellë për të respektuar Ronaldon, Portugalia nderon CR7: Tjetri do të jetë i përjetshëm

Portugalia ka zgjedhur një mënyrë të veçantë për të nderuar Cristiano Ronaldon, në ndeshjen ndaj Danimarkës, e para pas largimit të yllit 40-vjeçar nga Kombëtarja.

Legjenda e futbollit portugez mund të mos jetë më në fushë me fanellën e përfaqësueses, por gjurmët që ka lënë në historinë e saj do të jenë të përjetshme. Për këtë arsye, Federata Portugeze ka vendosur që t'i kushtojë një homazh simbolik, duke ndryshuar dizajnin e numrit 7 në fanellën e skuadrës.

Nëpërmjet një videoje të publikuar në rrjetet sociale, Portugalia ka zbuluar pamjen e re të këtij numri legjendar. Ndryshe nga versioni tradicional që mbante Ronaldo gjatë gjithë karrierës së tij, numri i ri ka një vijë në mes, e cila formon një kryq.

Një detaj i vogël në pamje të parë, por me një domethënie të madhe për një futbollist që e ktheu numrin 7 në simbolin e tij dhe shkroi histori me fanellën luzitane.

“Koha për të debutuar me një numër 7 të ri. Sepse është një numër që do të jetë i përjetshëm”, ishte mesazhi emocionues i Portugalisë, që shoqëronte videon e publikuar.

Kështu, edhe pse Cristiano Ronaldo nuk do të jetë më në fushë, numri i tij legjendar do të vazhdojë të jetojë në historinë e Kombëtares portugeze. Një epokë mbyllet, por trashëgimia e CR7 mbetet e përjetshme.