Shamani rus planifikon të sakrifikojë 60 deve për fitoren e Rusisë në Ukrainë, shpërthejnë reagimet

Një njoftim i pazakontë ka shkaktuar reagime të forta në Rusi, pasi një shaman i vetëshpallur ka deklaruar se planifikon të sakrifikojë 60 deve brenda një viti, me pretendimin se ritualet do të ndihmojnë Rusinë të fitojë luftën në Ukrainë. Plani ka nxitur kundërshtime nga organizatat për mbrojtjen e kafshëve, por edhe nga përfaqësues të komuniteteve të tjera shamaniste, të cilët e konsiderojnë praktikën të papajtueshme me traditat e tyre shpirtërore.

Bëhet fjalë për 53-vjeçarin Artur Chibikov, drejtues i organizatës shamaniste “Eternal Blue Sky”, me seli në qytetin Angarsk, në rajonin e Irkutskut, në Siberi. Ai i bëri publike planet në një video të publikuar në fund të tetorit, ku njoftoi se ritualet do të nisin në nëntor. Sipas planit të tij, do të theren pesë deve çdo muaj, për një periudhë prej 12 muajsh, duke arritur në total 60 kafshë. Chibikov pretendon se përmes këtyre ceremonive synon t’u kërkojë falje dhe ndihmë perëndive sllave, si dhe të sigurojë suksesin ushtarak të Rusisë. Në një intervistë për median ruse “Lyudi Baykala”, ai mbrojti nismën, duke argumentuar se sakrificat janë të nevojshme për të pastruar vendin nga energjitë negative dhe për të garantuar një fitore të plotë në fushën e betejës.

Megjithatë, deri më tani nuk ka konfirmime se ndonjë prej deveve është sakrifikuar. Gjithçka mbetet në fazën e planit të shpallur nga shamani. Chibikov ka shkaktuar polemika edhe më parë për shkak të ritualeve të tij. Në vitin 2019, ai organizoi një ceremoni në rajonin e Irkutskut, gjatë së cilës u therën pesë deve dhe pjesë të trupave të tyre u dogjën në një turrë rituale. Pamjet e ceremonisë shkaktuan reagime të shumta në Rusi dhe detyruan prokurorinë rajonale të niste një hetim. Në përfundim, Chibikov u gjobit me 3 mijë rubla, por jo për therjen e kafshëve. Sanksioni u vendos për transportimin e deveve pa dokumentacionin dhe lejet e nevojshme nga autoritetet veterinare.

Shamanë të tjerë kundër ritualit: Nuk përfaqëson traditat tona
Njoftimi i ri ka shkaktuar përplasje edhe brenda komuniteteve shamaniste në Siberi. Shamanja tuvane Aleftina Sagan-Ool ka kundërshtuar publikisht metodat e Chibikov, duke theksuar se sakrifica të tilla nuk kanë lidhje me traditat e popullit të saj. Edhe Kara-Ol Dopchun-Ol, një prej figurave të njohura të komunitetit shamanist në Rusi, kishte dënuar ceremoninë e vitit 2019, duke argumentuar se praktika të tilla janë të papajtueshme me shamanizmin tradicional. Kundërshtimeve u janë bashkuar edhe organizatat rajonale, përfshirë komunitetin shamanist “Tengeri”, me qendër në Ulan-Ude. Përfaqësuesit e tyre argumentojnë se shamanizmi tradicional bazohet në harmoninë me natyrën dhe jo në sakrifica të përgjakshme për objektiva ushtarake.

Devetë kanë pasur historikisht një rëndësi të veçantë në disa rituale nomade të Azisë Qendrore, ndërsa konsiderohen kafshë me status të shenjtë në traditat shpirtërore të disa popujve indigjenë të Siberisë, përfshirë Tuvanët dhe Burjatët. Për këtë arsye, propozimi i Chibikov është cilësuar nga disa përfaqësues të këtyre komuniteteve si fyerje ndaj zakoneve dhe trashëgimisë së tyre shpirtërore.

Thirrje autoriteteve për të ndaluar sakrificat
Organizatat për mbrojtjen e kafshëve kanë kërkuar ndërhyrjen e autoriteteve dhe të prokurorisë rajonale për të parandaluar therjen e planifikuar të dhjetëra deveve. Ndërkohë, autoritetet rajonale në Siberi deri më tani janë distancuar nga nisma, pa dhënë një përgjigje konkrete për mundësinë e zhvillimit të ceremonive. Rasti ka rikthyer në vëmendje edhe përdorimin e besimeve dhe ritualeve tradicionale në kontekstin e luftës në Ukrainë. Që prej nisjes së pushtimit rus, disa grupe shamaniste dhe figura ultranacionaliste kanë organizuar ceremoni për bekimin e ushtarëve dhe kanë shpërndarë amulete mbrojtëse për ata që nisen drejt frontit.

Edhe pse Kisha Ortodokse Ruse mbetet institucioni kryesor fetar i lidhur me shtetin, praktika të tilla kanë gjetur hapësirë në disa qarqe periferike, ku besimet popullore ndërthuren me retorikën nacionaliste dhe mbështetjen për luftën.