Gazeta irlandeze: Ramën e presin me vezë në Dublin, qytetarët nuk u lejuan të hyjnë për t’i bërë pyetje

Nga Jack Horgan-Jones, THE IRISH TIMES

Një person është arrestuar pas një proteste në Dublin, e zhvilluar gjatë një aktiviteti ku ishte i pranishëm kryeministri i Shqipërisë, Edi Rama.

Një grup protestuesish ishte mbledhur pranë Institutit për Çështjet Ndërkombëtare dhe Evropiane (IIEA), ku Rama po mbante një fjalim mbi “rrugëtimin evropian” të Shqipërisë.

Grupi, i përbërë kryesisht nga shqiptarë që jetojnë në Irlandë, tha se kërkonte më shumë llogaridhënie nga qeveria në Tiranë.

Protestuesit deklaruan se dëshironin që qeveria shqiptare të dëgjonte zërin e qytetarëve që protestojnë në Shqipëri. Ata i bënë gjithashtu thirrje Bashkimit Evropian të luftojë korrupsionin në vend, ndërsa Shqipëria synon anëtarësimin në BE.

Anëtarë të grupit thanë të mërkurën se fillimisht kishin siguruar bileta përmes një seksioni të faqes së internetit të IIEA-së, i cili ishte i hapur për publikun. Ata kishin planifikuar të merrnin pjesë në aktivitet dhe t’i drejtonin pyetje Ramës.

Megjithatë, sipas tyre, IIEA më pas i anuloi biletat, duke i njoftuar se aktiviteti ishte vetëm për anëtarët e institutit.

Kur disa prej protestuesve tentuan të bëheshin anëtarë të IIEA-së, iu tha se instituti nuk do të kishte mundësi ta përfundonte procedurën e anëtarësimit përpara zhvillimit të aktivitetit.

Enida Friel, njëra prej personave të cilëve iu anulua bileta dhe që iu bashkua protestës, deklaroi: “Ajo që Bashkimi Evropian bëri për Irlandën, ne duam të njëjtën gjë për Shqipërinë. Qëllimet tona janë pozitive.”

Ajo tha se grupi i shqiptarëve nuk kishte synuar të pengonte zhvillimin e aktivitetit, por thjesht dëshironte t’i drejtonte pyetje kryeministrit Rama.

Kreu i qeverisë shqiptare u prit me thirrje kundërshtuese gjatë mbërritjes, ndërsa të paktën një vezë u hodh në drejtim të tij. Në atë moment, në rrugën North Great George’s Street kishte prani të policisë irlandeze (Garda).

Policia konfirmoi se kishte ndërhyrë për një incident të prishjes së rendit publik, rreth orës 12:30.

“Një burrë, rreth të 50-ave, i cili u arrestua, është liruar më pas pa iu ngritur asnjë akuzë”, thuhej në deklaratën e policisë.

Një zëdhënëse e IIEA-së tha se aktivitetet e institutit janë vetëm për anëtarët, përveç rasteve kur njoftohet ndryshe. Ajo shpjegoi se ftesa për aktivitetin u ishte dërguar anëtarëve, së bashku me një lidhje për regjistrimin në faqen e internetit, por se aktiviteti nuk ishte promovuar publikisht nga instituti.

“Kur u bë e qartë se një numër personash që nuk ishin anëtarë ishin regjistruar, ne i kontaktuam dhe i njoftuam se nuk mund të merrnin pjesë në aktivitet. Këtë e bëjmë rregullisht për të garantuar vlerën e anëtarësimit”, tha ajo.

Zëdhënësja theksoi se lista e pjesëmarrësve nuk ishte ndarë me përfaqësuesit shqiptarë dhe as me ndonjë palë tjetër.

“Na vjen sinqerisht keq për çdo keqkuptim të krijuar dhe, si gjest vullneti të mirë, secilit prej personave në fjalë i ofruam mundësinë për ta ndjekur aktivitetin online, ku mund të parashtronin pyetje përmes funksionit të bisedës”, tha ajo.

“Ne ishim shumë të gatshëm ta mundësonim këtë dhe moderatori përcolli te folësi pyetje si nga personat e pranishëm në sallë, ashtu edhe nga ata që ndiqnin aktivitetin online.”