16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
BOTA
VIDEO/ Shkoi për të marrë makinën e sekuestruar, i dehuri shkakton aksident si në filma
PiranjatPërditësimi i fundit 2 November 2026, 18:49
Një incident i rëndë është regjistruar mëngjesin e së dielës, 1 nëntor, në Hania të Kretës, ku një 45-vjeçar, pasi ishte ndaluar nga policia për drejtim mjeti në gjendje të dehur, është rikthyer në ambientet ku ishte dërguar automjeti i tij dhe e ka marrë atë pa leje.
Ngjarja nisi rreth orës 04:32 të mëngjesit, kur drejtuesi iu nënshtrua testit të alkoolit nga efektivët e Policisë Rrugore të Haniasë, në kryqëzimin e rrugëve Kissamou dhe Selinou. Matjet me aparatin e posaçëm të policisë rezultuan 0,996 mg/l në testin e parë dhe 0,587 mg/l në të dytin.
Për shkeljen e konstatuar, ndaj tij u morën masat administrative përkatëse, iu hoqën dokumentet e qarkullimit dhe automjeti u bllokua e u transportua në ambientet e kompanisë “Hellas Service”, në kilometrin e dytë të rrugës së vjetër nacionale Hania–Kissamos, në zonën Germaniko Pigadi.
U rikthye për të marrë makinën dhe përplasi punonjësin
Por ngjarja nuk përfundoi me bllokimin e automjetit. Sipas informacioneve, rreth orës 07:25, 45-vjeçari u rikthye në ambientet e kompanisë, hyri brenda dhe mori makinën e tij. Gjatë largimit, ai dyshohet se përplasi një punonjës të kompanisë, duke e tërhequr zvarrë për rreth 10 metra. Më pas, automjeti u përplas me një mur rrethues prej betoni të një prone fqinje, të cilin e shembi. Pas aksidentit, drejtuesi u largua menjëherë nga vendngjarja, duke marrë drejtim të panjohur.
U gjet në banesë, testi konfirmoi sërish dehjen
Policia u vu sërish në lëvizje dhe rreth orës 08:10, efektivët e Policisë Rrugore, së bashku me forcat e grupit DIAS, lokalizuan automjetin të parkuar pranë banesës së drejtuesit, në rrugën Mavromati.
45-vjeçari ndodhej brenda shtëpisë, por doli vetë dhe u shoqërua në ambientet e shërbimit përkatës policor. Aty iu nënshtrua një tjetër testi të alkoolit, ku matjet rezultuan 0,872 mg/l dhe 0,76 mg/l, duke konfirmuar se ai vijonte të ishte nën efektin e alkoolit. Ndaj tij po përgatitet dosja penale për drejtim të rrezikshëm të automjetit në gjendje të dehur, shkaktim të dëmtimeve të rënda trupore dhe dëmtim të pronës së tjetrit. Çështja pritet t’i përcillet Prokurorisë së Shkallës së Parë në Hania. /PiranjatNews/
