Skandal në shkollën publike në Durrës/ Prindërve u kërkohet para për të pastruar dhe lyer klasat e fëmijëve!

Një denoncim ka mbërritur në redaksinë e Piranjat News, nga prindërit e nxënësve të shkollës “Bajram Curri”, në zonën e Plazhit në Durrës.

Sipas denoncimit, shkolla i është nënshtruar rikonstruksionit që prej muajit maj, me një afat përfundimi prej 6 muajsh, por punimet ende nuk kanë përfunduar. Ndërkohë, fëmijët pritet të zhvillojnë mësimin në ambientet ku ndërhyrjet kanë mbetur pezull.

Ajo që ka revoltuar më shumë prindërit është kërkesa për të kontribuar financiarisht dhe për t’u angazhuar vetë në pastrimin e ambienteve të shkollës. Sipas mesazhit të mbërritur në redaksinë tonë, prindërve u është kërkuar një kontribut prej 1 mijë lekësh të reja për çdo fëmijë, për larjen dhe pastrimin e klasave.

Një prej prindërve, e cila thotë se është edhe kryetare e këshillit të prindërve të klasës, shprehet se shkolla ka mbetur peng i punimeve të papërfunduara dhe se nxënësit rrezikojnë të vazhdojnë mësimin me orar të mbasdites, duke u kthyer në shtëpi në orët e vona.

Por pyetja që ngrihet është: Pse duhet të paguajnë prindërit për pastrimin dhe përgatitjen e ambienteve të një shkolle publike? Kush mban përgjegjësi për zvarritjen e rikonstruksionit dhe kushtet në të cilat do të mësojnë fëmijët?

Piranjat News sjell shqetësimin e prindërve dhe pret një reagim nga institucionet përgjegjëse.