“Ju erdhi fundi”/ Protesta 'pushton' rrugët e Tiranës, vajzat udhëheqin marshimin në ditën e 116-të

Ka nisur marshimi i protestuesve në rrugët e Tiranës, në ditën e 116-të të protestës, si vijim i revoltës qytetare që prej më shumë se tre muajsh zhvillohet kundër qeverisë. Pas përfundimit të fjalimeve para Kryeministrisë, qytetarët janë zhvendosur në rrugët e kryeqytetit dhe aktualisht ndodhen në rrugën “Ismail Qemali”.

Në krye të marshimit janë vajzat, të cilat, me megafonë në duar, udhëheqin protestuesit dhe artikulojnë thirrje kundër qeverisë dhe sistemit politik. Nën sloganin “Ju erdhi fundi”, qytetarët vijojnë marshimin në rrugët e Tiranës.

Përpara nisjes së marshimit, qytetarë dhe aktivistë të ndryshëm morën fjalën në podiumin e vendosur para Kryeministrisë, ku kërkuan ndryshim dhe largimin e kryeministrit Edi Rama.

“Edi Rama, jep dorëheqjen”, “Ju erdhi fundi”, “Rama në burg, Berisha në burg” dhe “Ndryshim sistemi”, ishin disa nga sloganet e dëgjuara gjatë protestës. Gjithashtu, ata thirrën në kor “Qeveri e krimit”, “Rama jep dorëheqjen”, “Arrestoni Ramën”, etj.

Edhe në ditën e 116-të, tubimit iu bashkuan qytetarë të grupmoshave dhe profesioneve të ndryshme, mes tyre të rinj, të moshuar, studentë, profesionistë dhe aktivistë.

Marshimi vijon në rrugët e kryeqytetit, pas fjalimeve të mbajtura përpara godinës së Kryeministrisë.