Tragjedia në Athinë, reagon Ministria e Jashtme: Ndajmë pikëllimin me familjet e viktimave

Ministria për Evropën dhe Punët e Jashtme ka shprehur ngushëllimet pas tragjedisë së rëndë të ndodhur në Athinë, ku një shpërthim i pasuar nga shembja e një ndërtese shkaktoi disa viktima.

Në reagimin zyrtar, MEPJ thekson se, sipas raportimeve, tre persona me origjinë shqiptare janë mes personave që humbën jetën.

“Jemi thellësisht të pikëlluar nga humbja tragjike e jetëve pas shpërthimit dhe shembjes së ndërtesës në Athinë, me raportime se tre persona me origjinë shqiptare janë midis viktimave.

U shprehim ngushëllimet tona të sinqerta familjeve dhe të dashurve të të gjithë atyre që humbën jetën. Mendimet tona janë me ta në pikëllimin e tyre dhe u urojmë të plagosurve shërim të shpejtë dhe të plotë”, thuhet në reagimin e Ministrisë së Jashtme.

MEPJ thekson se tragjedia prek nga afër edhe Shqipërinë, ndërsa shpreh solidaritet me familjet e personave të prekur nga ngjarja.

“Kjo tragjedi e prek nga afër Shqipërinë. Ne ndajmë pikëllimin e familjeve të prekura dhe shprehim solidaritetin tonë me fqinjët tanë grekë dhe popullin amerikan”, shkruan Ministria për Evropën dhe Punët e Jashtme.