Në korrik të këtij viti, në media u raportua se “vila e partisë” në fshatin Mborje të Korçës ishte dj...
BOTA
VIDEO nga momenti/ Panik në kopshtin zoologjik, tigri sulmon burrin para vizitorëve
PiranjatPërditësimi i fundit 10 Tetor 2026, 19:11
Skena tronditëse janë regjistruar pasditen e së shtunës në një park të jetës së egër në Britaninë e Madhe, ku një burrë hyri në kafazin e një tigri dhe u sulmua nga kafsha, përpara syve të vizitorëve të tmerruar.
Sipas Daily Mail, ngjarja ndodhi rreth orës 13:30 në Parkun e Jetës së Egër të Yorkshire, pranë Doncaster, në Angli.
Burri, identiteti i të cilit nuk është bërë i ditur, dyshohet se ishte në gjendje të rënduar ankthi kur hyri në ambientin ku mbahej tigri. Kafsha e sulmoi, duke i shkaktuar lëndime të rënda.
Në një video që po qarkullon në rrjetet sociale, burri, i veshur me bluzë të zezë, shihet i gjunjëzuar në tokë me krahët e shtrirë. Në një moment, tigri i afrohet nga pas dhe e sulmon, duke e kafshuar në shpinë. Kafsha e rrëzon përtokë dhe vijon ta sulmojë, duke qëndruar më pas sipër tij.
Në pamje, burri dëgjohet duke bërtitur vazhdimisht: “Ndal!”.
Në vendngjarje mbërritën forca të shumta policie, dy ambulanca dhe një helikopter i shërbimit të ambulancës ajrore. Vizitorët u evakuuan, ndërsa parku u mbyll.
Sipas raportimeve, punonjësit e parkut dyshohet se përdorën gaz lotsjellës për të trembur kafshën dhe për ta larguar nga burri i plagosur.
Dëshmitarët thanë se dëgjuan deri në pesë të shtëna me armë zjarri. Fillimisht nuk ishte e qartë nëse tigri ishte vrarë, por policia konfirmoi më vonë se kafsha kishte mbetur brenda hapësirës së saj të mbyllur.
Panik në park: “Dëgjuam të shtëna me armë”
Pas sulmit, vizitorëve iu kërkua të largoheshin menjëherë nga Parku i Jetës së Egër të Yorkshire.
Dominic Ford, i cili po vizitonte parkun së bashku me mbesën e tij katërvjeçare, tregoi se si punonjësit i kërkuan të largohej nga zona.
Sipas tij, stafi dukej i qetë pavarësisht seriozitetit të situatës. Ai pa një helikopter të ambulancës ajrore, një ambulancë dhe një numër të madh efektivësh policie që mbërritën në vendngjarje.
Një tjetër vizitore, Tia Hanson, i tha gazetës The Star se ndodhej në park me një shoqe kur shtegu që lidhte ambientin e tigrave me daljen u bllokua.
“Duket sikur dikush është hedhur brenda. Njerëzit thonë se kanë dëgjuar një të shtënë dhe se dikush ose është hedhur, ose ka rënë brenda”, deklaroi ajo.
Hanson shtoi se, gjatë largimit, vizitorët duhej të kalonin pranë kafazit të tigrave, por zona ishte mbuluar me perde të zeza, duke kufizuar pamjen e asaj që kishte ndodhur.
Punonjësit vendosën mbulesa të zeza rreth zonës së sulmit pas incidentit.
Parku strehon dy tigra Amur
Parku i Jetës së Egër të Yorkshire është shtëpia e dy tigrave Amur, një nga nënllojet më të mëdha dhe më të rralla të tigrave në botë.
Kafshët janë femra Tschuna, e cila peshon rreth 108 kilogramë, dhe mashkulli Altai, i cili mbërriti në park në mars të vitit 2025.
Deri më tani, nuk është bërë e ditur se cili prej dy tigrave sulmoi burrin.
Çfarë thonë policia dhe shërbimi i ambulancës
Shërbimi i Ambulancës së Yorkshire konfirmoi se ishte njoftuar për incidentin në orën 13:33 të së shtunës, më 10 tetor 2026.
“Dërguam disa njësi në vendngjarje, përfshirë dy ambulanca, helikopterin e Ambulancës Ajrore të Yorkshire dhe një mjek”, deklaroi një zëdhënës i shërbimit, duke iu referuar policisë për informacione të mëtejshme.
Nga ana e saj, policia konfirmoi se burri kishte pësuar lëndime të rënda si pasojë e sulmit.
“Në orën 13:35 të së shtunës, më 10 tetor, morëm njoftimin se një burrë kishte hyrë në ambientin e mbyllur të tigrave në Parkun e Jetës së Egër të Yorkshire. Tigri më pas e sulmoi, duke i shkaktuar lëndime serioze”, deklaroi një zëdhënës i policisë.
Autoritetet po përpiqen të kontaktojnë familjarët e të plagosurit. Për momentin, nuk janë bërë të ditura identiteti i tij dhe gjendja e saktë shëndetësore.
Policia sqaroi gjithashtu se tigri mbeti brenda ambientit të tij dhe se nuk kishte rrezik për qytetarët e tjerë.
“Pas incidentit, parku është evakuuar dhe efektivët vijojnë të qëndrojnë në vendngjarje, ku po kryejnë hetimet”, thuhet në deklaratë.
Parku do të qëndrojë i mbyllur edhe të dielën Drejtuesit e Parkut të Jetës së Egër të Yorkshire konfirmuan se në ambientin e tigrave kishte ndodhur një “incident serioz” dhe se procedurat e emergjencës ishin aktivizuar menjëherë.
“Procedurat e emergjencës u aktivizuan menjëherë dhe shërbimet e emergjencës ndodhen aktualisht në vendngjarje. Po bashkëpunojmë ngushtë me autoritetet për të përcaktuar saktësisht se çfarë ka ndodhur”, thuhet në deklaratën e parkut.
Drejtuesit theksuan se siguria dhe mirëqenia e vizitorëve, stafit dhe kafshëve mbetet përparësia kryesore.
Parku njoftoi se do të qëndrojë i mbyllur për pjesën e mbetur të së shtunës dhe gjatë së dielës, më 11 tetor. /PiranjatNews/
A man has reportedly jumped into the tiger enclosure at The Yorkshire Wildlife Park in England. Looking at these images, there is something wrong with this man. He is trying to point a finger at the tiger ???????? https://t.co/8xCGpfzMNS
