Ronaldo njofton tërheqjen, i jep fund karrierës me Portugalinë

Cristiano Ronaldo ka njoftuar tërheqjen nga kombëtarja e Portugalisë, duke i dhënë fund një prej kapitujve më të rëndësishëm në historinë e futbollit ndërkombëtar. Pas 23 vitesh me fanellën luzitane, ylli i futbollit ka vendosur të mbyllë aventurën e tij me përfaqësuesen, në një moment që vjen pas tensioneve të fundit me trajnerin Jorge Jesus.

Lajmi u bë publik këtë të enjte, përmes një videoje emocionuese rreth pesëminutëshe, të publikuar në rrjetet sociale.

Ronaldo nuk priti shpalljen e listës së lojtarëve për ndeshjet e nëntorit, por vendosi t’u drejtohej vetë tifozëve portugezë për të komunikuar vendimin e tij.

41-vjeçari largohet nga kombëtarja si golashënuesi dhe futbollisti me më shumë paraqitje në historinë e futbollit ndërkombëtar për meshkuj.

Në videon e tij, Ronaldo shprehu mirënjohjen për të gjithë ata që e kanë shoqëruar gjatë këtij rrugëtimi, duke theksuar se fanella e Portugalisë ka qenë gjithmonë një përgjegjësi dhe nder i veçantë.

Në mesazhin e tij, ai u shpreh:

“Popullit portugez, ka ardhur dita kur ia kthej fanellën me numrin 7 të gjithë kombëtares sonë. Ajo nuk më përkiste kurrë vetëm mua, por për 23 vite pata nderin dhe përgjegjësinë ta mbaja, ta mbroja dhe ta përfaqësoja në fushat e futbollit në të gjithë botën.

Sot ka ardhur momenti që këtë flamur t’ia dorëzoj së ardhmes. Nuk ishte një vendim i lehtë, sepse ka vendime që nuk merren vetëm me mendje, por ku merr pjesë edhe zemra.

Po përfundoj një rrugëtim që nisi në gusht të vitit 2003 dhe që ma ndryshoi jetën përgjithmonë.

Kur kthehem pas dhe kujtoj gjithçka që kam përjetuar me kombëtaren, nuk shoh vetëm ndeshje, gola, rekorde dhe trofe, por shoh njerëzit.

Në fund të fundit, futbolli është shumë më tepër sesa një lojë. Ai është njerëzit.

Gjatë gjithë karrierës sime me kombëtaren, jam përpjekur të shkoj përtej kufijve të mi. Kam dashur të fitoj, të jem më i miri dhe të shkruaj historinë. Kam dhënë gjithçka për këtë fanellë.

Nëse ju kam bërë ndonjëherë të lumtur, nëse ju kam bërë të përqafoni dikë pas njërit prej golave të mi, të harroni një moment të vështirë apo të ndiheni krenarë për vendin tonë, atëherë gjithçka që kam bërë ia ka vlejtur.

Portugalia do të ketë gjithmonë nevojë për të rinj që ëndërrojnë, për lojtarë që nuk dorëzohen dhe për breza të rinj që besojnë se mund të arrijnë aty ku askush nuk ka arritur më parë.”

Statistikat dhe rekordet e Cristiano Ronaldos me Portugalinë

Cristiano Ronaldo e mbyll aventurën e tij me kombëtaren portugeze me shifra historike. Në 234 ndeshje të zhvilluara gjatë 23 viteve, ylli portugez ka realizuar plot 146 gola, duke u bërë futbollisti me më shumë paraqitje dhe golashënuesi më i mirë në historinë e kombëtareve të meshkujve.

Përveç rekordeve individuale, Ronaldo ka qenë protagonist në periudhën më të suksesshme të Portugalisë. Arritja më e madhe erdhi në vitin 2016, kur udhëhoqi skuadrën drejt triumfit në Kampionatin Evropian, pas fitores 1-0 ndaj Francës në finale. Tre vite më vonë, ai ngriti edhe trofeun e parë të UEFA Nations League, ndërsa në vitin 2025 fitoi për herë të dytë këtë kompeticion, pas triumfit ndaj Spanjës në finalen e vendosur me penallti.

Në nivel individual, Ronaldo mban rekordin për numrin më të madh të golave në historinë e Kampionateve Evropiane, me 14 realizime në fazat finale, si dhe rekordin e paraqitjeve në këtë kompeticion. Ai ka qenë gjithashtu një prej futbollistëve më vendimtarë të Portugalisë në eliminatore dhe turnetë madhorë, duke shënuar gola në pesë edicione të ndryshme të Kupës së Botës.

Me 146 gola, 234 ndeshje dhe tre trofe madhorë, Cristiano Ronaldo e mbyll kapitullin ndërkombëtar si një prej figurave më të rëndësishme në historinë e futbollit portugez dhe botëror.