Studentët dhe të rinjtë kanë thirrur një protestë kombëtare këtë të martë, më 13 tetor, në or...
SOCIALE
Raporti/ Shqiptarët parkojnë ku të duan, 1 në 3 gjoba për qëndrime të ndaluara
PiranjatPërditësimi i fundit 13 Tetor 2026, 13:51
Shkeljet e rregullave të parkimit dhe qëndrimit në rrugë përbëjnë pjesën më të madhe të masave administrative të vendosura ndaj drejtuesve të automjeteve në vend. Sipas publikimit më të fundit të Institutit të Statistikave (INSTAT), gjatë vitit 2025, 34% e masave administrative lidheshin me qëndrimet dhe pushimet e ndaluara, nga 31,1% një vit më parë dhe 30% në vitin 2023.
Të dhënat tregojnë se parkimi dhe qëndrimi në vende të ndaluara vijojnë të jenë shkeljet më të shpeshta të konstatuara nga Policia Rrugore, ndërsa pesha e tyre në totalin e kundërvajtjeve është rritur për të tretin vit radhazi.
Në vend të dytë renditet mosrespektimi i normave të shpejtësisë, me 18,9% të masave administrative, nga 25,4% në vitin 2024. Mosrespektimi i sinjalizimeve rrugore përbënte 14,3% të masave, nga 12,6% një vit më parë.
Parakalimet e gabuara zinin 7,7% të masave, qarkullimi pa rrip sigurimi apo sisteme fiksimi 5,5%, ndërsa përdorimi i telefonit gjatë drejtimit të automjetit përbënte 3,4%.
Në total, masat administrative për shkeljet rrugore u rritën me 2,2% krahasuar me vitin 2024.
Më pak aksidente, por më shumë viktima
Ndërkohë që masat administrative u rritën, numri i aksidenteve rrugore në Shqipëri shënoi rënie gjatë vitit 2025. Sipas INSTAT, u regjistruan 1.375 aksidente, nga 1.666 në vitin 2024, një ulje prej 17,5%.
Gjithsesi, numri i personave që humbën jetën u rrit me 14,3%, ndërsa treguesi i vdekshmërisë arriti në 14,5 të vrarë për 100 aksidente, nga 10,5 një vit më parë.
Në total, 1.913 persona mbetën të vrarë ose të plagosur në aksidentet rrugore, nga 2.255 në vitin 2024.
Sipas INSTAT, sjellja e drejtuesve të mjeteve ishte shkaktare e 87,9% të aksidenteve, ndërsa sjellja e këmbësorëve përbënte 12,1% të rasteve.
Drejtuesit me mbi nëntë vite eksperiencë në drejtimin e automjeteve shkaktuan 49,2% të aksidenteve, ndërsa ata me deri në tre vite eksperiencë, 16,3%.
Grupmosha 25-34 vjeç regjistroi numrin më të lartë të aksidenteve të shkaktuara nga drejtuesit e mjeteve, me 331 raste, ose 24,1% të totalit.
Tirana vijoi të kryesojë për numrin e aksidenteve, me 447 raste, ose 32,5% të totalit kombëtar, megjithëse shënoi rënie nga 552 aksidente në vitin 2024. Lezha renditej e dyta me 169 aksidente, e ndjekur nga Korça me 134 dhe Fieri me 117.
Korça regjistroi një rritje të ndjeshme të aksidenteve, nga 60 në vitin 2024 në 134 gjatë vitit 2025, ndërsa Durrësi shënoi ulje nga 172 në 91 aksidente.
Sipas kategorisë së rrugëve, 28,3% e aksidenteve ndodhën në rrugët interurbane dytësore dhe 23,2% në rrugët urbane dytësore. Rreth 88,1% e aksidenteve u regjistruan në kushte moti të thatë.
E hëna ishte dita me numrin më të lartë të aksidenteve, me 231 raste, ndërsa intervali 08:00-12:00 përqendroi 21,7% të tyre.
Raporti i aksidenteve për 1.000 mjete në qarkullim ra në 1,3 gjatë vitit 2025, nga 1,7 në vitin 2024, sipas të dhënave të INSTAT./MONITOR
