VIDEO/ Pamje dramatike. Toka hapet papritur dhe përpin gruan me fëmijën në krah

Ky është momenti tronditës kur nëna dhe foshnja përpihen nga një gropë gjigante, teksa trotuari shembet papritur nën këmbët e tyre.
Pamjet e kamerave të sigurisë tregojnë gruan duke dalë nga një furrë buke, me fëmijën në krahë. Ajo kthehet sërish drejt dyqanit për të biseduar me një burrë që ndodhej brenda, kur papritur një pjesë e madhe e trotuarit shembet.
Nëna, foshnja dhe një kalimtar që po kalonte aty pranë përfundojnë të gjithë brenda gropës, në një shembja ndodhi brenda pak sekondash.
Ngjarja e frikshme ndodhi në Sumaré, në pjesën juglindore të shtetit brazilian të São Paulos, rreth orës 11:00 të paradites së të hënës.
Një video e dytë tregon situatën pas shembjes, ku shihet një gropë gjigante, të paktën 4.5 metra e thellë, me tre personat të bllokuar në fund të saj.
Disa persona u mblodhën rreth gropës dhe u përpoqën t'u vinin në ndihmë të rënëve, pavarësisht rrezikut të një shembjeje të mëtejshme.
Pronarët e dyqaneve aty pranë u organizuan menjëherë për të shpëtuar tre personat, duke përdorur një litar dhe një shkallë për të zbritur deri tek ata.
Foshnja u nxor e para në sipërfaqe, më pas nëna e saj dhe në fund burri që kishte rënë gjithashtu në gropë.
Pronarja e furrës së bukës, Conceicao Aparecida Pereira, tha se kishte vënë re një lëkundje të lehtë të trotuarit pak para shembjes, por nuk kishte dyshuar se diçka nuk shkonte.
“U ndje sikur kishte kaluar një kamion. Vetëm kaq, asgjë tjetër. Gjithçka ishte normale”, tregoi ajo.
Policia ushtarake bëri të ditur se të tre personat ishin të vetëdijshëm kur shërbimet e emergjencës mbërritën në vendngjarje.
Rreshteri i zjarrfikësve, Ari Motta, deklaroi se nëna kishte pësuar disa gërvishtje në këmbë, veçanërisht në zonën e gjunjëve dhe shputave.
Për mrekulli, foshnja duket se nuk kishte pësuar lëndime, por u transportua në spital për kontrolle mjekësore, si masë paraprake.
Edhe kalimtari që u përfshi në shembje u largua nga vendngjarja për të marrë ndihmë mjekësore, përpara mbërritjes së zjarrfikësve.
Sipas raportimeve, të tre personat pësuan vetëm lëndime të lehta, pavarësisht thellësisë së madhe të gropës.
Autoritetet dyshojnë se shembja mund të jetë shkaktuar nga çarja e një strukture nëntokësore të inspektimit, pas reshjeve të dendura të shiut.
Mendohet se rritja e prurjeve të ujit në një përrua që kalon në një kanal nën trotuar ka dëmtuar strukturën nëntokësore.
Sekretari i Punëve Publike, Fernando Luis Pereira, shpjegoi se përroi ishte devijuar nëntokë shumë vite më parë.
“Ka një përrua që zbret në këtë zonë, i cili në të kaluarën është kanalizuar nën këtë shesh sportiv. Ai kalon përgjatë skajit të trotuarit, më pas futet në mes të rrugës dhe vazhdon drejt lumit Quilombo”, deklaroi ai.
Inxhinierët janë dërguar në vendngjarje për të vlerësuar dëmet dhe për të përcaktuar nëse erozioni ka prekur edhe strukturën e furrës së bukës. /PiranjatNews/
Lexo edhe
BOTA
Suedia merr vendimin historik, e drejta për abort mbrohet me Kushtetutë

Vajza e vogël piu qumësht me kokainë dhe vdes, burgosen prindërit

Joe Biden kritikon Zelenskyy-n në librin e tij: I vështirë për të punuar me të dhe jo aq mirënjohës sa prisja

Sulm me armë kimike në Uashington? Reagon Araghchi: Na kurseni nga propaganda e stilit të luftës në Irak

Kuvendi i Serbisë nis punën me përfaqësimin e ri, Vuçiç përplaset me lëvizjen studentore: Terror institucional!





