18 ditë pa Lolën, Oriola Marashi tregon për herë të parë çfarë pa në ëndërr

Modelja shqiptare Oriola Marashi vazhdon të shpresojë për rikthimin e qenushes së saj, Lolës, e cila është zhdukur prej 18 ditësh. Përmes një postimi në InstaStory, ajo ka ndarë një mesazh tejet emocional, duke treguar se së fundmi e ka parë të dashurën e saj katërputroshe edhe në ëndërr.

“Sonte të pashë në ëndërr. Lola ime… Erdhe pranë meje dhe për pak m’u duk sikur të kisha përsëri në krahë. U zgjova me mall, por edhe me shpresën se një ditë do të kthehesh tek unë. 18 ditë pa ty”, ka shkruar modelja.

Në fotografinë e publikuar, Oriola shfaqet duke mbajtur në krahë Lolën, ndërsa dedikimin e ka shoqëruar me simbole që shprehin trishtimin dhe mallin për mungesën e saj.

Qenushja humbi më 17 tetor, rreth orës 16:27, në zonën e Patokut. Që prej asaj dite, modelja ka bërë disa apelime publike, duke kërkuar ndihmën e qytetarëve për gjetjen e saj.

Lola është e racës Toy Poodle, me ngjyrë kafe dhe peshon rreth 3.3 kilogramë. Në momentin e zhdukjes mbante një rrip të zi dhe përshkruhej si e frikësuar. Për këdo që mund të japë informacion që ndihmon në gjetjen dhe kthimin e qenushes, Oriola ka ofruar edhe një shpërblim prej 2 mijë eurosh.

Pas 18 ditësh larg saj, modelja vijon të mos e humbasë shpresën se Lola do të kthehet sërish në krahët e saj.