Detaje të reja kanë dalë nga ekspertiza balistike për ngjarjen e rëndë në Baldissero d’Alba, në provincën e C...
AKTUALITET
DETAJET/ Kush janë pronarët e lokalit që ju vendos tritol në Durrës, çfarë filmuan kamerat e sigurisë
PiranjatPërditësimi i fundit 30 Shtator 2026, 10:40
Ramazan Balla dhe Erjon Balla janë pronarët e lokalit në Sektor Fllakë të Durrësit, në derën e të cilit u vendos një sasi lënde plasëse mëngjesin e sotëm. Shpërthimi ndodhi rreth orës 05:00 dhe shkaktoi vetëm dëme materiale.
Sipas raportimeve në media, kamerat e sigurisë kanë fiksuar një person të maskuar, i cili rreth orës 04:00 është afruar pranë lokalit dhe ka vendosur lëndën plasëse pranë një kolone të godinës. Rreth një orë më vonë, eksplozivi dyshohet se është aktivizuar në mënyrë të telekomanduar.
Godina është dykatëshe, me lokalin në katin e parë dhe banesën në katin e dytë. Nga shpërthimi janë dëmtuar ambientet e biznesit, ndërsa zhurma e fortë ka alarmuar banorët e zonës.
Pas ngjarjes, në vendin e shpërthimit kanë shkuar shërbimet e Policisë dhe grupi hetimor, të cilët kanë nisur hetimet për identifikimin dhe kapjen e autorit apo autorëve.
Ramazan dhe Erjon Balla kanë deklaruar se nuk kanë konflikte me persona të tjerë, ndërsa sipas verifikimeve paraprake nuk rezultojnë me precedent penal.
Përveç identifikimit të autorit, hetuesit po punojnë edhe për zbardhjen e motivit të sulmit, ndërsa po verifikohen pamjet e kamerave të sigurisë në zonë për të ndjekur lëvizjet e personit të dyshuar para dhe pas shpërthimit.
“Rreth orës 05:00, në Sektor Fllakë, në derën e lokalit në përdorim të shtetasve R. B. dhe E. B., dyshohet se ka shpërthyer një sasi e vogël lënde plasëse. Si pasojë janë shkaktuar vetëm dëme materiale. Në vendngjarje shkuan shërbimet e Policisë dhe grupi hetimor, i cili vijon veprimet për zbardhjen e rrethanave, identifikimin dhe kapjen e autorit/autorëve’,- thuhej në njoftimin paraprak të policisë.
