“Investimi në Sazan, ende po negociojmë”/ Rama: Kushner nuk ka marrë asnjë trajtim ndryshe nga ai që u është dhënë investitorëve të tjerë

Kryeministri Edi Rama ka reaguar lidhur me projektin në ishullin e Sazanit dhe përfshirjen e Jared Kushner në këtë investim, duke theksuar se ai nuk ka përfituar asnjë trajtim të ndryshëm nga investitorët e tjerë.

Duke folur nga Dublini, Rama tha se faktet mbi projektin mund të verifikohen përmes faqes së quajtur “Pasqyra e flamingove”, ndërsa hodhi poshtë pretendimet për ekzistencën e një projekt-marrëveshjeje. Sipas kryeministrit, negociatat janë ende në vijim dhe procesi duhet të jetë i hapur për shqiptarët.

Ai bëri gjithashtu të ditur se vetëm 8 për qind e sipërfaqes së ishullit parashikohet të ndërtohet. Rama tha ndër të tjera se Shqipëria ka kërkuar një projekt ambicioz, që sipas tij të mos jetë një investim spekulativ, por një simbol i ri për vendin dhe Europën.

“Kemi një faqe që është ‘Pasqyra e flamingove’ dhe mund të gjesh fakte, jo retorikë, dhe përmes fakteve shihni se Jared Kushner nuk ka marrë asnjë trajtim të ndryshëm nga ai që u është dhënë investitorëve të tjerë. Nuk ka asnjë projekt-marrëveshje, sepse ne jemi ende duke negociuar dhe pala jonë është në pozicionin ku publiku shqiptar duhet të jetë pjesë e procesit. 8 për qind e ishullit do të ndërtohet. Qeveria shqiptare ka qenë rigoroze për të kërkuar një projekt që të jetë simbol, emblemë në Europë, jo spekulim, një projekt që do të lidhë imagjinatën kolektive me një zhvillim të paimagjinueshëm," tha Rama.