Ish-ministri fshehu 20 mln dollarë në pyll. Ekspertëve iu deshën 8 orë për t’i numëruar

Detaje të reja kanë dalë në dritë mbi sekuestrimin nga autoritetet hungareze të rreth 19.5 milionë dollarë cash, të cilat ishin fshehur në pyje, ndërtesa bujqësore, depo dhe prona banimi, në kuadër të një hetimi për korrupsion ndaj një ish-ministri të qeverisë së Viktor Orbanit.

Miklós Seszták, i cili drejtoi Ministrinë e Zhvillimit Kombëtar nga viti 2014 deri në vitin 2018, dyshohet për marrje ryshfeti në një skemë që lidhet me blerjen e autobusëve të përdorur nga një kompani shtetërore transporti, me çmime të fryra.

Operacioni u zhvillua të enjten dhe të premten, në disa lokacione të kontrolluara nga Zyra Kombëtare e Rimëkëmbjes dhe Mbrojtjes së Pasurive (NVVH), organi hungarez kundër korrupsionit. Sipas autoriteteve, gjatë kontrolleve u gjetën shuma të mëdha parash të groposura në pyje, të fshehura në ndërtesa bujqësore dhe magazina, si dhe të ruajtura në kasaforta në prona të izoluara.

Në total u sekuestruan 5.07 miliardë forinta hungareze, 2.65 milionë euro dhe 1.25 milionë dollarë amerikanë, me një vlerë të përgjithshme që arrin në rreth 19.5 milionë dollarë.

Paratë u depozituan në llogarinë e Thesarit të Shtetit Hungarez. Ministri i Financave, András Kármán, bëri të ditur se 12 punonjës të Thesarit u angazhuan për tetë orë për numërimin e tyre, duke përdorur pesë makina të posaçme.

Rasti i ish-ministrit vjen në kuadër të hetimeve të shtuara për korrupsion në Hungari, pas fitores së Péter Magyar në zgjedhjet e prillit, që i dhanë fund 16 viteve të Viktor Orbanit në pushtet.

Gjatë fushatës, Magyar premtoi hetimin e dyshimeve për korrupsion dhe abuzim me detyrën gjatë qeverisjes së paraardhësit të tij. Në javët e fundit, në kuadër të çështjeve të ndryshme penale, janë ndaluar Seszták, dy ish-ministra të tjerë të periudhës së Orbanit dhe vëllai i ish-kryeministrit.

Kryeministri Magyar e përshëndeti sekuestrimin e parave, duke e cilësuar atë si një zhvillim të rëndësishëm në përpjekjet për të hetuar korrupsionin e dyshuar.

“Kjo shënon zyrtarisht fundin e mafies Fidesz-KDNP!”, deklaroi ai, duke iu referuar koalicionit që drejtoi Hungarinë gjatë qeverisjes së Orbanit.

Ndërkohë, Viktor Orban nuk ka reaguar për sekuestrimin e fundit. Ai i ka cilësuar më herët hetimet ndaj personave të afërt me të si “persekutim politik”, duke pretenduar se synojnë burgosjen e tij.