Kreu i grupit parlamentar të PL-së, Tedi Blushi kundërshtoi në Komisionin e Ligjeve projektin e PS-së për reformën ter...
AKTUALITET
Prisnin një fëmijë, por mbetën të dy nën rrënoja, historia e trishtë e Florinit dhe Erisit
PiranjatPërditësimi i fundit 28 Shtator 2026, 13:37
Dy ditë më parë, një shpërthim i fuqishëm tronditi zemrën e Athinës dhe shembi një godinë në zonën e Plakës. Pas orëve të kërkimeve, nën rrënoja u gjetën gjashtë viktima, mes tyre edhe tre shqiptarë.
Mes tyre ishin Eris Cani dhe bashkëshorti i saj, Florin Hoxha.
Por pas emrave të tyre fshihet një tjetër dimension i dhimbshëm i kësaj tragjedie. Eris dhe Florin po prisnin fëmijën e tyre të parë. Sipas raportimeve të mediave greke dhe dëshmive të një miku të familjes, Eris ishte rreth tre muajshe shtatzënë.
Ata kishin udhëtuar drejt Greqisë së bashku me çiftin tjetër, Florida Hoxha dhe Ian Alexander Kirkpatrick, të cilët gjithashtu humbën jetën në tragjedi. Florida dhe Iani ishin martuar së fundmi dhe ndodheshin në Greqi për muajin e mjaltit.
Dy çifte, katër jetë dhe një udhëtim që duhej të mbetej një kujtim i bukur, u kthyen në një prej tragjedive më të rënda për familjet e tyre.
Për Erisin dhe Florinin, dhimbja është e pakthyeshme. Ata nuk do ta shohin kurrë fëmijën që prisnin dhe nuk do ta dëgjojnë kurrë të thërrasë “mami” dhe “babi”.
Në të njëjtën godinë humbën jetën edhe Athena Paparescu dhe Edmond Hings, të dy 77 vjeç. Hetimet greke vijojnë për të zbardhur shkaqet e shpërthimit dhe shembjes së ndërtesës. Pista e rrjedhjes së gazit është ndër mundësitë që po shqyrtohen, por autoritetet ende nuk kanë përcaktuar përfundimisht shkakun.
Athina i mori gjashtë jetë. Por historia e Erisit dhe Florinit mbetet edhe më e dhimbshme: një çift që po priste të sillte në jetë një fëmijë, por që nuk pati mundësinë ta takonte kurrë.
