“Në Shqipëri pushteti nuk ka frikë nga votuesi”/ Garo bën krahasimin me SHBA-në: Çfarë ndodh kur amerikanët ndjejnë se po u merren paratë

Floriana Garo komentoi rezultatet e zgjedhjeve në Shtetet e Bashkuara të Amerikës, duke i cilësuar ato si një shembull të demokracisë së gjallë dhe fuqisë së votës së qytetarëve.

Garo u shpreh se i kishte bërë përshtypje pjesëmarrja e të rinjve dhe diversiteti i shoqërisë amerikane, ndërsa vuri në dukje se votuesit amerikanë nuk lejojnë që pushteti t'i marrë si të mirëqenë. Sipas saj, në SHBA qytetarët e ndëshkojnë politikisht një qeverisje kur janë të pakënaqur me mënyrën se si ajo i trajton interesat dhe paratë e tyre.

Duke bërë një krahasim me Shqipërinë, Garo tha se këtu pushteti nuk ka frikë nga votuesi, ndryshe nga ajo që, sipas saj, dëshmon modeli amerikan.

Ajo ndau gjithashtu përvojën e saj personale, duke kujtuar se ka jetuar për tetë vite në SHBA dhe se vazhdon të shohë të njëjtën mënyrë funksionimi të demokracisë amerikane, pavarësisht ndryshimeve ndër vite.

Sa i përket rezultateve të fundit, Garo ngriti dyshimet se një pjesë e votuesve që kishin mbështetur Donald Trump në zgjedhjet e mëparshme nuk kanë shkuar të votojnë këtë herë. Sipas saj, pakënaqësia për rritjen e çmimeve dhe qëndrimet ndaj luftës mund të kenë ndikuar në këtë rezultat.