Studentët ndryshojnë strategji, protestë kombëtare dy herë në javë. Ja ditët dhe ora 

Studentët kanë njoftuar zhvillimin e protestës së radhës kombëtare ditën e shtunë, më 7 nëntor, në orën 14:00, përpara Ministrisë së Arsimit.

Në një deklaratë publike, ata bëjnë të ditur se pas më shumë se 150 ditësh protestë të pandërprerë, do të ndryshojnë strategjinë e organizimit, duke vendosur që protestat kombëtare të zhvillohen dy herë në javë, çdo të mërkurë dhe të shtunë, në orën 14:00.

Studentët theksojnë se kërkesa e tyre kryesore mbetet dorëheqja e kryeministrit Edi Rama, ndërsa akuzojnë pushtetin se ka injoruar kërkesat e protestuesve.

“Autokracia ka lëshuar rrënjë të thella në Shqipëri dhe ne jemi të përgatitur për një betejë të gjatë. Prandaj, po hyjmë në një fazë të re organizimi”, thuhet në deklaratë.

Sipas tyre, ky ndryshim synon t’i japë rrjetit studentor dhe mbështetësve mundësinë për të qenë më aktivë dhe për të ruajtur intensitetin e protestave.

Gjithashtu, “Studentët n'protestë” bëjnë të ditur se do të vijojnë të mbështesin edhe protestat e tjera qytetare kundër qeverisë, pavarësisht datës kur ato organizohen.

“Lufta e shqiptarëve për demokraci vazhdon. Autokracia do të bjerë, ashtu siç ra edhe diktatura”, përfundon deklarata e studentëve.