“Protesta do të vazhdojë”/ Marjana Koçeku: Rinia të bëhet gati të përfaqësohet në Kuvend!

Deputetja e pavarur, Marjana Koçeku ka bërë thirrje që protesta qytetare të kalojë në një fazë të re organizimi, duke synuar përfaqësimin e drejtpërdrejtë të të rinjve në Kuvendin e Shqipërisë.

Ajo u bën apel partive politike, të vjetra dhe të reja, që t’i hapin rrugë organizimit të pavarur të rinisë, të cilin e konsideron një mundësi për të krijuar përfaqësimin më legjitim të 35 viteve të tranzicionit.

Marjana Koçeku: “Nuk asht ma çështja nëse protesta do vazhdojë apo jo. Protesta do vazhdojë, kjo s’ka dyshim. Çështja ma e rëndësishme sot asht se si protesta duhet të marrë nji formë përfaqësimi, të gjejë mënyrën e duhun për nji konsensus sa ma të gjanë dhe, përveçse aktive në sheshet publike, të jetë gati për nji liste përfaqësimi në institucionin ma të naltë të kësaj Republike, që asht Kuvendi i Shqipnisë.

Për këtë duhet solidaritet në popull dhe nji mirëkuptim prej të gjitha partive, të vjetra e të reja, që t’i lirojnë rrugë organizimit dhe përfaqësimit ma të pamvarun e ma legjitim të këtyne 35 viteve tranzicion, përfaqësimit të rinisë.”