“Rama e bëri Shqipërinë me Regres Raport”, Belind Këlliçi: BE ngre alarmin për korrupsionin, tenderat dhe mbrojtjen e Ballukut

Deputeti i Partisë Demokratike, Belind Këlliçi, ka reaguar pas publikimit të Raportit të Progresit të Komisionit Europian për Shqipërinë për vitin 2026, duke e akuzuar kryeministrin Edi Rama se po përpiqet ta paraqesë si sukses një dokument që, sipas tij, evidenton probleme serioze me korrupsionin, drejtësinë dhe funksionimin e institucioneve. 

Përmes një reagimi në rrjetet sociale, Këlliçi shprehet se raporti i Brukselit është një dëshmi e keqqeverisjes së vendit, ndërsa akuzon Ramën se ka penguar drejtësinë përmes mbrojtjes politike të Belinda Ballukut në Kuvend.

Reagimi:

Edi Rama ia doli ta bëjë Shqipërinë me Regres Raport! Vetëm Kryeministri më i korruptuar në Europë mund ta quajë vlerësim dhe sukses raportin e BE, kur aty ngrihet shqetësimi për mbrojtjen e Belinda Ballukut dhe aferave të saj në Kuvend duke penguar drejtësinë, kur evidentohet abuzim i lartë në tenderat qeveritare, kur theksohet refuzimi i llogaridhënies, i komisioneve hetimore që ka kërkuar Partia Demokratike dhe opozita, kur vihet në dukje cënimi i lirisë së medias, ku thuhet hapur se fondet e IPARD III sërish nuk do të vijnë, pasi autoritetet këtu nuk bindin se nuk do t'i vjedhin prapë.

Këto janë vetëm disa nga "vlerësimet" e Komisionit, për Edi Ramën e qeverisjen e tij, ku qartazi del se ai është pengesa kryesore e integrimit të vendit tonë.

Sigurisht Narkoshteti i parë në Europë, nuk mund të trajtohet ndryshe!